盒誌嘅第一期散文雜誌出版喇
今次係佢地第一次當賣書咁銷售
之前每期都係擺喺唔同地方免費取閱
記得盒誌係2017年出版
我不嬲有留意或者儲開呢啲令大家嘅文字
有容身之處嘅寫作平台
遠至《西瓜皮》
由網上轉用紙出版再轉番上網嘅《小心輕看》
再到《盒誌》
仿佛不斷有人了解到一班寫作嘅人嘅需要
於是乎無論要劃幾多支火柴
都想起個爐俾大家可以圍埋取暖
呢本《野草》讀起上黎
好有讀報紙專欄嘅味道
售價58元
入面有廿八篇散文
有好多聽都未聽過嘅筆名人名
其實香港從來唔缺少會寫嘢有心寫嘢嘅人
但有幾多人會有機會俾大家見到
又好似我網站上面
都開左個友好專欄嘅位
仲寫左幾位專欄作者嘅介紹
有時會成日諗番
自己讀書果時寫完啲嘢都會傳俾同學睇
傳下傳下都快就傳晒成班，果時嘅分享幾簡單
如果香港最後真係成為一個
養唔到我地寫作出版玩音樂同拍戲嘅地方
我地係唔會咁易死架
會去晒其他地方繼續我地嘅創作旅程之嘛
到時咪可能會見到香港人去晒台灣出書
喺晒各國啲地鐵站車站busking
出晒外國拍電影囉
唔係香港嘅創作人無料到呀
係喺香港果時大家當佢地無到呀